Fahatsiarovan-tena
Ny an'ny olona kajiny ary tiany ho kanto hatrany
Izay mivava toa ho rava dia tohanany hijoro
Mba ho vaovao indray ka mahazendana aok'izany
fa mihantsy ny fotoana 'zay tia manorotoro
Ny antsika kosa indrisy ny hany mba navelan-drazana
Ary eken'ny Tontolo fa harena soa sy mendrika
Potipotika sy dotra fa naongan-tsy ho tazana
Ary ho levona doria toy ny vakin-tsambo rendrika
Ny an'ny olona mijoro hitantara ny fahiny
Ny antsika indray ravana hikosehana ny lasa
Ny an'ny olona ny misy dia endre ankamamiany
Ny antsika ifandrafiana toy ny heloka mandatsa.
Inona àry n'ho tahiry raha izay misy dia simbana
Toy ny zaza raha miady dia ravana izay natao
Ho forohona no sisa hipetraka hifandovana
Ary vovoka mandrevo no mba solon-kilalao.
Inona no holazain'ny taranaka any aoriana
Raha mody vovoka isika ka indro izy hanontany
Mba nankaiza ny tety no tsy nisy nohariana
Ho porofon'ny fisiany fony izy teto an-tany
Melun 14/08/2005
f-x mahah